Bleikir erum vér saurstamparnir...

Margt gerist í hverfinu mínu. Það hefur einhver undarleg og allsherjar hrörnun átt sér stað í hverfinu mínu s.l. árin. Skuggalegri karakterar eru farnir að sjást skjótast milli húsa, sumar nætur vaknar maður við öskur og önnur læti, löggan farin að verða meira áberandi og til að  kóróna allt saman þá voru  tveir  vesalings menn lamdir í buff hér úti á horni um daginn. Og svo tala menn um að vel gangi að endurlífga þetta gamla hverfi.

Það var nú samt ekki það sem ég vildi ræða. Heldur það að ég vaknaði um daginn (þ.e.a.s. um miðja nótt) við skarkala og læti. Leit útum svefnherbergisgluggann og sá ekkert. Leit svo niður í átt að kjallaratröppunum hvar þvottamaskínan okkar er geymd sem og leigjandinn í kjallaranum (svona sérinngangur bak við hús) og sá mér til mikillar furðu bleikan saurstamp. Kleip mig í handlegginn og allt kom fyrir ekki. Saurstampurinn var þar enn. Kleip þá konuna en ekki hvarf hið bleika postulín. Allt frekar súrrealískt. Snaraði mér í náttslopp, greip digital myndavél konunnar og hljóp út. Bjóst hálft í hvoru við að grípa í tómt. Svo var þó ekki. Við mér blasti bleikt klósett í kjallaratröppunum. Og meira en það. Þar var einnig þvottavél á hverja var úðað rauðum stöfum "Guys Rule". Klóraði mér í hausnum, fór inn og aftur uppí rúm. Undarlegur draumur þetta. Daginn eftir var stampurinn og maskínan á bak og burt en myndirnar þó enn í vélinni. Ekki veit ég hvað þetta átti að fyrirstilla...

Margt gerist í hrörnandi íbúðarhverfum...